ENTROIDO DE CÓMIC 2026

Despois dos tres mandadiños, o do xoves nos invitaba a lucir os disfraces relacionados con noso PDI "NovenArte-BD". Por iso, cada nivel/ciclo caracterizouse seguindo esta temática: viñetas, bocadillos, Pitufos, Policán e superheroes e superheroínas. A chuvia non nos impediu facer un pequeno desfile polo pavillón municipal, onde nos sentimos como grandes estrelas da banda deseñada!

O venres, Mimi invitounos a facer un novo desfile polos corredores e estancias do cole no que puidemos ver os orixinais disfraces dos maiores e pequenos/as do cole. Pasámolo xenial!

🎉 🎭 FELIZ ENTROIDO! 🎭 🎉

Moitas grazas pola vosa colaboración! 

MANDADIÑOS DE ENTROIDO 2026

Un ano máis, Mimi, a mascota da biblioteca, invitounos a celebrar o Entroido presentando os tradicionais mandadiños que seguimos con tantísima ilusión. Este ano, as primeiras peticións estiveron relacionadas coa forma de vestir de coñecidas personaxes de banda deseñada: Mafalda, Tintín e Snoopy. 

Queredes ver o ben que o recreamos? Estade atent@s que haberá máis! 🎭 🎉

 

 

DÍA DA PAZ E A NON VIOLENCIA 2026

Con motivo do PDI deste curso "NovenArte-BD", o Día da Paz e da Non Violencia e o Día da Ilustración (30 de xaneiro) centráronse na creación de murais colaborativos a modo de viñetas nas que o alumnado reflexionou sobre a situación que está a vivir o noso planeta. 

A través de dúas tiras de Mafalda, iniciouse a reflexión acerca do que lle ocorre e cales son os problemas que está "a sufrir", o que supuxo reflexionar sobre o  significado da non violencia, a empatía, a solidariedade, a cooperación, o compañeirismo, a tolerancia... 

Como non podía ser doutro xeito, as nenas e os nenos do CEIP Amor Ruibal propuxeron fermosas mensaxes e bos desexos que van facer deste, un mundo moito mellor!

Aquí tedes o resultado do traballo realizado de maneira conxunta por todo o alumnado do centro 😍

AMBIENTACIÓN 25N

Durante a semana previa ao 25N, o alumnado do CEIP Amor Ruibal preparou diferentes logos e lemas para conmemorar o Día Internacional para a eliminación da violencia contra as mulleres e reivindicar a fin desta lacra social.

Unha vez que os reunimos todos, elaboramos un fermoso mural onde eliximos como protagonista a unha das personaxes máis coñecidas da banda deseñada: Mafalda. O motivo de escollérmola é que sempre se mostrou moi reivindicativa no eido da igualdade de dereitos entre a muller e o home.

Este foi o resultado do noso marabilloso traballo a prol da igualdade!

Grazas a todas e a todos pola vosa colaboración!

PRESENTACIÓN DO PDI

Una ano máis abrimos a nosa biblioteca coa celebración do Día das Bibliotecas Escolares. Por iso, o o alumnado de 6º acudimos a todas as aulas a presentar o PDI (Proxecto Documental Integrado) a través do cal imos a tematizar todas as actividades que fagamos este curso: NovenArte-BD.

Explicámoslles aos nosos compañeiros e ás nosas compañeiras que Snoopy fixo o 3 de outubro, 75 anos e, como os aniversarios son datas moi especiais e nos gusta moito esta personaxe, a escollemos como pretexto para traballar a banda deseñada. Ademais, ensinámoslle como son este tipo de textos e invitásmoslles a que sigan aprendendo sobre el. 

Queredes ver como o fixemos? 

 

Pica na imaxe para ver o vídeo que preparamos!

 

APERTURA DE BIBLIOTECA E DECORACIÓN DO PDI

O pasado día 24 de outubro conmemoramos o Día das Bibliotecas abrindo a nosa Biblioteca de Centro. O alumnado xa puido desfrutar de todos os contos e xogos que hai no seu interior durante o tempo dos recreos. Ademais esta semana comezará o préstamo de libros e o alumnado elixirá un libro da nosa biblioteca para levar para casa.

Tamén entre todo o alumnado decoramos a nosa entrada tendo en conta o PDI deste ano "NovenArte - Banda Deseñada". Mirade como quedou!!

CIRCO NA BIBLIOTECA DE BARRO

O noso alumnado de 4º, 5º e 6º de Primaria gozou hoxe cunha divertidísima actuación de circo no Salón de Actos da Biblioteca Pública. O espectáculo estivo protagonizado por Dani Blanco, que fixo as ledicias do público coas súas historias, malabares, libros, escapismos... aderezados con moitísimo humor.

Moitísimas grazas!!!

Moitísimos Parabéns!!!

CINEFÓRUM CON NOVOS CINEMAS

 Esta semana todo o alumnado do centro gozou dunha xornada de cinefórum a cargo de Suso Novás, director do Festival Novos Cinemas.

 

 Cada un dos ciclos desprazouse ao Pazo da Crega (cedido polo Concello para esta actividade) para visionar unhas magníficas curtametraxes de animación cheas de valores tales como a bondade, a empatía, o amor fraternal, a diversidade, e a soliedaridade entre outros e participar a continuación dun animado coloquio.

• La Boulangerie de Boris (A panadería de Boris)
• Tournesol (Xirasol)
• Parapluies (Paraugas)
  
• Entre Deux Soeurs (Entre irmáns)
• Va-T'en Alfred (Lisca, Alfred)

 

Moitísimas grazas!! 

 

HISTORIAS DE CINE NO DÍA DO LIBRO

No marco da conmemoración do Día do Libro, gozamos hoxe de dúas magníficas funcións relacionadas co tema do noso PDI "O cine"que correron a cargo de Raquel Queizás.

 

O alumnado de Infantil, 1º, 2º e 3º de Primaria acudíu á representación de "Cinema Maravillas. Ver para Ler" no que que descubriron catro contos clásicos da literatura a través de adaptacións de cine mudo. Grazas a diversas técnicas cinematográficas gozamos do inxeño de Queliña mergullada nestes contos.

 

Pola súa banda, o alumnado de 4º, 5º e 6º de Primaria coñeceu de primeira man a figura de Alice Guy como precursora cineasta e contadora de historias, na función que leva por título "Cinema de historias da man de Alice Guy"

 

Pasámolo de cine! 

Moitísimas grazas!

PILABOT: RECOLLIDA DE PILAS E BATERÍAS

 Estamos xa no ecuador do Concurso de reciclaxe de pilas, baterías e acumuladores, "PILABOT", convocado pola Xunta de Galicia, xunto a Ecopilas, Ecolec. 

Temos xa un colector cheo, imos polo segundo. 

Animádevos a colaborar con nós no coidado do medioambiente e na xestión destes residuos altamente contaminantes. Seguiremos coa recollida ata final de curso.

 

Moitísimas grazas familias pola vosa implicación!

ENTROIDO ... DE CINE

Ao longo desta semana e como vén sendo costume no centro, MIMI, a mascota da Biblioteca, presentou diariamente os mandados que seguimos con moita ilusión.

O mandado do xoves facía alusión ao noso PDI "Cine de Barro" e por esta razón cada ciclo ou nivel caracterizouse seguindo a temática do mesmo. Ese día fixemos un pequeno desfile desde o centro ata a explanada diante do pavillón, onde nos agardaban familiares para acompañar o noso percorrido.

 

Chegado o venres, puidemos gozar novamente cun desfile, baile e moitísima ilusión por mostrar os nosos disfraces favoritos.

 

FELIZ ENTROIDO!

Moitísimas grazas pola vosa colaboración! 

 

DÍA DA PAZ 2025

Ao longo desta semana, para conmemorar o Día da Paz e o Día da Ilustración (ambos o día 30 de xaneiro) todo o alumnado desenvolveu actividades moi variadas de investigación, lectoescritura, musicais e plásticas que lles permitiron reflexionar sobre os valores da non violencia, o amor, a solidariedade, a cooperación, o compañeirismo e non a discriminación ou o egoísmo. Todos eles valores e actitudes que debemos ter en conta para resolver conflitos e acadar unha convivencia pacífica.

Este ano, e dado que o noso PDI é "Cine de Barro" empregamos curtametraxes, películas e videoclips para desenvolver o noso traballo. Podedes miralos a continuación premendo nos títulos:

El erizo (Infantil, 1º e 2º de EP)

For the birds Os paxaros (1º, 2º, 3º e 4º de EP)

The bridge A ponte ( 3º e 4º de EP)

A Joy Story: Joy and Heron  Unha historia "feliz": Joy e a garza (3º e 4º de EP)

O neno do pixama de raias. (5º de EP)

Are you lost in the world like me? Estás perdido no mundo coma mín? (6º de EP)

 

Velaquí o resultado do traballo realizado, variados e vistosísimos murais cheos de fermosas palabras froito das nosas reflexións.