3 de decembro de 2021

"Baixo o mesmo paraugas"

Hoxe, 3 de decembro, conmemórase o Día Internacional das Persoas con Discapacidade, e no CEIP Amor Ruibal non podemos pasar por alto esta data tan sinalada.

Coñecer a diversidade, aceptala e respectala debe ser un dos maiores obxectivos da comunidade educativa. Por ese motivo, o alumnado de 2º e 3º curso non dubidou en unirse a iniciativa #BaixoOMesmoParaugas, na que preto de 90 entidades sociais de toda Galicia únense baixo os seus paraugas para reivindicar unha sociedade máis unida e igualitaria para todas as persoas.

 Sabes como podes unirte? É moi sinxelo:
- O día 3 sube unha foto cun paraugas e unha mensaxe positiva cos hashtag #ParaugasPolaDiscapacidade e #BaixoOMesmoParaugas.
- Etiqueta as túas amizades e rétaas a facer o mesmo.
- Etiqueta a @galiciadiversa.

☂️☔️☂️☔️☂️ Enchemos as redes de paraugas de cores!☔️☂️☔️☂️☔️






30 de novembro de 2021

AS FAMILIAS CONTAN...

Xa está en marcha, un curso máis, o noso proxecto "As familias contan...".

Animádevos a participar!!!


25 de novembro de 2021

25N 2021

Co motivo do DÍA INTERNACIONAL DA ELIMINACIÓN DA VIOLENCIA CONTRA AS MULLERES, no CEIP Amor Ruibal de Barro desenvolvemos diversas actividades para axudar ao alumnado a reflexionar, sensibilizar e concienciar sobre a violencia contra as mulleres, a igualdade, os estereotipos e os roles de xénero. Foron actividades de lectoescritura, contos, animacións, curtas, diálogos, debates, audicións musicais, aprendizaxe da canción  A porta violeta (a nosa versión en galego do afamado tema de Rozalén), obradoiros de pulseiras violetas coa palabra "NON", a creación dun mural colaborativo baixo o lema "RACHEMOS AS VIOLENCIAS CONTRA AS MULLERES!!!" e escenificacións nas que o alumnado rachou violencias de todo tipo que causan tanto dano, tristeza e dor.

Nenas e nenos, mozas e mozos chegaron á conclusión de que a coeducación, a educación en igualdade, é a solución para eliminar esta eiva social e gozar dun mundo mellor.

Moitísimas grazas, familias, pola vosa colaboración!!!


24 de novembro de 2021

PREVENCIÓN DO ABUSO DAS NOVAS TECNOLOXÍAS DENDE A FAMILIA

No marco do Proxecto de Prevención das Condutas Adictivas no eido local dos Concellos de Cuntis, Barro, Campo Lameiro, Moraña e Portas no que colabora o noso alumnado todos os cursos, convidamos ás familias a participar no interesante obradoiro "PREVENCIÓN DO ABUSO DAS NOVAS TECNOLOXÍAS DENDE A FAMILIA", que será impartido por Belén Montesa Lou e Juan Carlos Permuy Bermúdez, especialistas en psicoloxía e referentes no campo da prevención e intervención das condutas adictivas dende o ámbito familiar e escolar.



Por mor das circunstancias xeradas pola COVID19, e para facilitar a coordinación coas familias dos cinco Concellos, o obradoiro será virtual e realizarase o vindeiro martes, 30 de novembro, ás 18:00 h por videoconferencia na plataforma Zoom, Sala de Reunión 657 806 3555 (ID), á que poderedes acceder picando na seguinte ligazón:

https://zoom.us/j/6578063555

(IMPORTANTE: É preciso ter descargada a aplicación Zoom no dispositivo dende o que se acceda ao obradoiro: móbil, tablet, ordenador...).

Con este obradoiro preténdese complementar as actividades preventivas que nos últimos anos se veñen realizando no ámbito escolar co obxectivo de previr os riscos e o abuso das novas tecnoloxías na xuventude, seguindo así as directrices marcadas polo Plan Nacional sobre drogas e polo Plan Autonómico de drogodependencias e condutas adictivas de Galicia, nos que se lle dá cada vez máis protagonismo ás intervencións preventivas relacionadas coas novas tecnoloxías, destinadas fundamentalmente ao ámbito escolar e familiar.

Calquera dúbida podedes consultala contactando co Departamento de Prevención das Condutas Adictivas dos Concellos de Cuntis, Barro, Campo Lameiro, Moraña e Portas no teléfono 986 59 59 22 ou a través do mail prevenciondrogodependencias@concellodecuntis.es


20 de novembro de 2021

"O chineiro da tía María"

O alumnado de 2º curso de Educación Primaria gozou dunha contada de tradición oral a cargo de Chus de Xandobela.

A actividade, que leva por título  "O chineiro da tía María",  está recollida no Fondo de Proxectos Xacobeo 2021, e é promovida pola Secretaría Xeral de Política Lingüística da Xunta de Galicia.

As nenas e nenos prestaron moitísima atención e pasárono xenial!

Moitísimas grazas, Chus de Xandobela!

19 de novembro de 2021

20N 2021

Precioso mural colaborativo do alumnado do CEIP Amor Ruibal para conmemorar o Día Universal dos Dereitos da Infancia. Nel aparecen os 12 dereitos fundamentais recollidos na Convención dos Dereitos da Infancia e que deberían gozar as nenas e nenos de todo o mundo, sin ningún tipo de discriminación.


A actividade artística complementouse con actividades de lectoescritura, debuxos individuais e a interpretación musical da canción "Os dereitos humanos, o teu mellor instrumento" de Mili Vizcaíno e Pedro Calero.

FELIZ DÍA DA INFANCIA!!!

6 de novembro de 2021

MAGOSTO 2021

Que ben o pasamos onte no noso Magosto con xogos, cancións, bailes e a tradicional degustación de castañas, que estaban boísimas!!!


Moitísimas grazas, familias, pola vosa colaboración!!!

Graciñas especiais ás familias que asaron as castañas nas súas locomotoras!!!


16 de outubro de 2021

VISITA DE POLO CORREO DO VENTO

O pasado xoves tivemos a sorte de recibir na nosa Biblioteca a Quique e Carlos, do equipo creativo Polo Correo do Vento, moi ben acompañados polo músico Antón Ke e a súa pulguiña cantareira (o ukelele). 

As crianzas de Infantil foron as primeiras en gozar das contadas ilustradas e musicais dos nosos amigos en dúas sesións moi divertidas, protagonizadas pola andoriña Mariquiña, a pita Agapita e a vaca Florentina, co amor e a amizade como temas principais. 


Pola súa banda, o alumnado de 4º de Primaria participou animadamente no obradoiro “Ciberseguridade con Sofía” no marco do programa “Ciberseguranza Kids” promovido pola Axencia para a Modernización Tecnolóxica de Galicia (AMTEGA) e o Colexio Profesional de Enxeñaría en Informática de Galicia (CPEIG). Dun xeito lúdico, as nenas e nenos recibiron claras recomendacións ilustradas e musicadas para navegar pola rede de forma segura e sen riscos. 

A actividade finalizou coa creación duns debuxos xeniais baixo a certeira guía do ilustrador.


Antes da despedida, os nosos visitantes asinaron no libro de honra da nosa Biblioteca.


Moitísimas grazas!!! 

10 de xullo de 2021

GRADUACIÓN E ENTREGA DE ORLAS 2021

O alumnado que rematou neste curso as etapas de Infantil e Primaria recibiu as súas correspondentes Orlas de Graduación, nuns actos que se desenvolveron sen a acostumada presenza familiar, por mor da situación sanitaria que nos tocou vivir.

Moitísimos Parabéns!!!

Boa andaina na nova etapa!!!

Bo verán!!!

17 de xuño de 2021

AGASALLOS DE LÚA

Que ben o pasaron hoxe e canto aprenderon as rapaciñas e rapaciños de Infantil cos fabulosos "Agasallos de Lúa. Contos pola inclusión" de Raquel Queizás!

Grandísimo pracer!!!


Moitísimas grazas!!!

16 de xuño de 2021

CONTOS PREMIADOS DE INFANTIL

O alcalde, Xosé Manuel Fernández Abraldes, visitou hoxe a Biblioteca do noso centro para facer entrega duns lotes de libros as aulas de 4º e 5º de Infantil como premio pola súa marabillosa participación no concurso "AS VERBAS QUE CONTAN" convocado polo Concello de Barro. As nenas e nenos recibiron, ademais, exemplares encadernados dos fermosos contos que crearon para o concurso.

Quedaron a mar de felices!!!

E que pouquiño durou o envoltorio das caixas!!!


Moitísimas grazas!!!

U-LA LÚA?

Grandísimo pracer recibir no noso cole a Celtia Figueiras e a súa compañía de monicreques A Xanela do Maxín para presentar o marabilloso espectáculo "U-la Lúa?" que fixo as delicias do alumnado de 1º, 2º, 3º e 4º de Primaria.

Unha auténtica gozada!!!

Moitísimas grazas!!!

31 de maio de 2021

DÍA MUNDIAL SEN TABACO

Hoxe, 31 de maio, conmemórase o Día Mundial Sen Tabaco. Con tal motivo, e no marco do proxecto de Prevención de Condutas Adictivas, compartimos o cartaz e o manifesto dos concellos de Cuntis, Barro, Campo Lameiro, Moraña e Portas, co fin de sensibilizar sobre os riscos do tabaco e promover medidas eficaces de prevención e abandono do seu consumo.


22 de maio de 2021

LETRAS GALEGAS 2021

No CEIP Amor Ruibal de Barro rendemos nestas Letras Galegas 2021 unha sentida homenaxe a Xela Arias, escritora, editora e tradutora, con contacontos ilustrados, poemas musicados, cancións e actividades variadas de investigación, de expresión artística e de fomento da lectoescritura e oralidade, como as que desenvolveron, por exemplo, o alumnado de Infantil ou as mozas e mozos de 5º de Primaria.


21 de maio de 2021

CONTACONTOS ILUSTRADOS: "XELA ARIAS, LOITANDO POLA IGUALDADE"

Esta semana recibimos a visita de Kike Mauricio e Carlos Taboada, do colectivo Polo Correo do Vento, para realizar co alumnado de Primaria contacontos ilustrados centrados na figura de Xela Arias, poeta e docente referente na loita pola igualdade, pertencente ao colectivo da "Festa da Palabra Silenciada" e homenaxeada este ano 2021 co Día das Letras Galegas.


A actividade está promovida polo departamento de Asuntos Sociais do Concello de Barro e enmárcase no Pacto de Estado contra a Violencia de Xénero, co obxecto de pór en valor o papel da muller na sociedade e a necesidade imperiosa de fomentar unha educación en igualdade plena e real.

MOITÍSIMAS GRAZAS!!!



15 de maio de 2021

A FAMILIA, MÁIS QUE UN TEITO!

Hoxe, 15 de maio, celébrase en todo o mundo o Día Internacional da Familia para crear conciencia sobre o papel fundamental que ten na educación das crianzas dende a primeira infancia, xerando aprendizaxes prosociais e saudables permanentes. Como conmemoración de dito día, compartimos unha interesante GUÍA PARA FAMILIAS creada por Julia Búa Núñez (Técnica de Prevención das Condutas Adictivas no eido local de Cuntis, Barro, Campo Lameiro, Moraña e Portas), na que atoparedes información básica sobre a prevención de condutas adictivas dende o ámbito familiar, principal axente de socialización.

Guía Familias Prevención Condutas Adictivas by Amor_Ruibal on Scribd

 
Moitas grazas por este interesantísimo recurso!
 

14 de maio de 2021

O XII PREMIO MIMI É PARA...

E o XII Premio MIMI, que alumnado e profesorado do CEIP Amor Ruibal de Barro concede a persoas que usan e defenden o uso do idioma galego, é para... 

ANA PELETEIRO!!!

 proposta pola Concellería de Xuventude de Barro.

MOITÍSIMOS PARABÉNS!!!

     Recibidas vía virtual as propostas, e logo dunha semana de estudo e consideración das candidaturas presentadas, hoxe desenvolveuse a xornada electoral cumplindo estrictamente cos protocolos da Covid-19, de xeito que os grupos burbulla emitiron escalonadamente o seu voto nas urnas instaladas en cada corredor e o profesorado especialista, na Biblioteca. 

     A última hora, o alumnado de 6º de Primaria, responsable do proxecto, fixo o reconto de votos e levantou acta do resultado, que publicou nos taboleiros dos corredores. 

     Ana Peleteiro impúxose por maioría absoluta ás outras candidaturas, que eran o grupo musical De Vacas, proposto pola Biblioteca Pública/OMIX de Barro, María Fumaça, pola Real Academia Galega, Luís Davila `O Bichero´, proposto pola Área de Normalización Lingüística da Universidade de Vigo, Raquel Queizás, polo Equipo de Dinamización da Lingua Galega do IES de Barro e Adolfo Caamaño, pola Concellería de Cultura de Barro.

Moitísimas grazas polas vosas valiosas aportacións!!!


RESOLUCIÓN DO CONCURSO "AS VERBAS QUE CONTAN"

O Concello de Barro, ao través da OMIX, vén de publicar a resolución do concurso "AS VERBAS QUE CONTAN" convocado no marco da conmemoración do Día das Letras Galegas 2021 e que contou cunha altísima participación, con obras de grande calidade.

As persoas gañadoras do noso centro son as seguintes:

CONTOS:

  • Categoría Infantil: Alumnado de 4º e 5º de Infantil.
  • Categoría 1º e 2º de Primaria: Hugo Martínez Dios con  A carpa e a troita.
  • Categoría 3º e 4º de Primaria: Sabela García Rey con Os recordos que me trae a viaxe do peregrino.
  • Categoría 5º e 6º de Primaria: Iria García Paz con Amizades distanciadas.


HAIKUS:
  • Categoría 1º e 2º de Primaria: Fiz Rea Tilve.
  • Categoría 5º e 6º de Primaria: Aldara Ocampo González.


Moitísimas grazas a todas as persoas participantes!!!

Moitísimos Parabéns ás persoas gañadoras!!!

A organización anunciará nos vindeiros días como e cando será o acto de entrega de premios que, dada a situación que estamos a vivir e por prudencia, será virtual e non presencial.