FESTA DA LINGUA 2026

No marco da celebración das Letras Galegas, O venres 15 de maio, o alumnado de 1º, 5º e 6º acudiu á Tafona de Caldas de Reis para asistir á Festa da Lingua. Nela gozamos de recitados de micropoemas e microrelatos, espectáculos musicais e monólogos en directo na nosa fermosa lingua.

O momentazo estelar chegou coa actuación de "The Rapants" que amenizaron unha xornada na que celebramos todas e todos xuntos o Día das Letras Galegas! Cantaron varias cancións coas que conseguiron vencer á chuvia e facer bailar a todos os asistentes (mesmo houbo unha mención especial aos nenos e ás nenas de Barro polo que estaban gozando).

Encantounos a experiencia e oxalá a poidamos repetila moitas veces máis! 

Como non, debemos dar as grazas ao Concello de Caldas e á Secretaría de Política Lingüística por patrocinar o evento e, como non podía ser doutro xeito, ao Concello de Barro por facer posible que puidésemos acudir de forma gratuíta! Graciñas a todas polo voso bo facer! 

💙🤍 Viva a nosa lingua! Viva a Lingua Galega! 💙🤍

LETRAS GALEGAS 2026

Nesta semana do 11 ao 17 de maio, o alumnado do CEIP Amor Ruibal conmemorou a Semana das Letras Galegas. Este ano, dedicado á escritora Begoña Caamaño

Realizáronse multitude de actividades, aquí vai un resumo!!!

CONCERTO INICIO CURSO ESCOLAR

O noso alumnado de Primaria gozou hoxe do tradicional concerto didáctico de inicio do curso escolar a cargo da Banda - Escola de Música de Barro. As nenas e nenos escoitaron con moita atención, cantaron e tiveron a grandísima oportunidade de probar os instrumentos. 

Pasárono xenial!!!

Moitísimas grazas!!!

Canto talento musical hai en Barro!!!

Moitísimos Parabéns!!!

ENTREGA AGASALLOS "AS VERBAS QUE CONTAN"

 Na mañá de onte, xoves, recibimos na Biblioteca do centro ao Alcalde de Barro, Xosé M. Fernández Abraldes para felicitar ao alumnado de Infantil pola súa participación no Concurso As verbas que contan 2025 ao que presentaron uns magníficos contos creados nas aulas. Fixo entrega, neste breve acto, duns lotes de libros para incorporar ás bibliotecas das respectivas aulas.

Cada encargado ou encargada de aula recibíu o lote de libros e un forte aplauso de todas as personas alí reunidas, logo posaron en grupo co agasallo recibido antes de volver as súas respectivas aulas. 

 

Moitísimos Parabéns!!

Moitísimas grazas!! 

 

CASTELAO PARA CRIANZAS

O alumnado de 2º e 3º ciclo de Primaria (3º, 4º, 5º e 6º) gozou na mañá de hoxe dunha interesantísima e enriquecedora actividade no Salón de Actos da Biblioteca Pública: "Castelao para crianzas" financiada ao abeiro do Programa Ler conta moito da Xunta de Galicia, neste 2025 que se celebra o Ano Castelao.

Nesta  sesión, e a través da narración, da música e o debuxo, tiveron a oportunidade de coñecer de cerca a figura do polifacético autor Alfonso D. Rodríguez Castelao, a súa obra e o seu amor pola lingua e cultura galegas.

Moitísimas grazas por iniciativas como esta que apoian a nosa cultura!! 

PROXECTO "AS NOSAS CANTIGAS" DE BARRO

Ao longo do curso, alumnado e familias colaborastes na recompilación de cantigas, xogos, adiviñas... Propios da nosa zona e doutros lugares nos que temos achegados, amizades...

Compartimos con outros centros de Galicia algunhas cantigas deste proxecto como xa mencionamos nunha entrada anterior:

Proxecto intercentros: As nosas cantigas 

Hoxe queremos amosar o resultado da nosa escolma, na que agrupamos as follas de recollida por parroquias do noso concello e outros lugares de Galicia. Esperamos que vos gusten.

Moitísimas grazas familias pola vosa colaboración!

CINEFÓRUM CON NOVOS CINEMAS

 Esta semana todo o alumnado do centro gozou dunha xornada de cinefórum a cargo de Suso Novás, director do Festival Novos Cinemas.

 

 Cada un dos ciclos desprazouse ao Pazo da Crega (cedido polo Concello para esta actividade) para visionar unhas magníficas curtametraxes de animación cheas de valores tales como a bondade, a empatía, o amor fraternal, a diversidade, e a soliedaridade entre outros e participar a continuación dun animado coloquio.

• La Boulangerie de Boris (A panadería de Boris)
• Tournesol (Xirasol)
• Parapluies (Paraugas)
  
• Entre Deux Soeurs (Entre irmáns)
• Va-T'en Alfred (Lisca, Alfred)

 

Moitísimas grazas!! 

 

FESTA DA LINGUA 2025

Hoxe, na fermosa mañá solleira do 16 de maio, o alumnado de 6º acudiu á Tafona de Caldas de Reis para asistir á Festa da Lingua. Nela gozamos de recitados de obras inéditas, espectáculos musicais e monólogos en directo na nosa fermosa lingua.

O momentazo estelar chegou coa actuación de "As Tanxugueiras" que se animaron, de forma desinteresada, a celebrar con nós o Día das Letras Galegas! Cantaron tres cancións, dúas delas de especial recordo para as nosas homenaxeadas, as cantareiras. A outra, como non podía ser doutro xeito, a mundialmente coñecida, Terra, que cantamos todas e todos xuntos a viva voz con elas.

   

Gozamos moitísmo da experiencia e oxalá a poidamos repetila moitas veces máis! Tamén debemos dar as grazas ao Concello de Barro por facer posible que puidésemos acudir a este evento!

Viva a nosa lingua! Viva a Lingua Galega!

LETRAS GALEGAS 2025

Hoxe gozamos dun marabilloso concerto no marco da conmemoración do Día das Letras Galegas, adicadas este ano ás cantareiras, que tanto e tan ben fixeron, fan e farán pola lingua e cultura galega.

Unha boa mostra do seu legado escoitámola hoxe na Nave da Música, que se encheu de talento local, completamente entregado a preservar e transmitir de xeración en xeración a música tradicional e a poesía popular oral. Así, integrantes da Asociación Peñaflor, Inés Tilve, Felipe Rea e nenas e mozas do Grupo de Danzas Amor Ruibal fixeron as delicias de todas as persoas alí reunidas.

 

Como colofón da magnífica celebración, todas e todos cantamos a todo cantar Olvídame.

 

 

Unha auténtica gozada!!! 

Moitísimas grazas!!!

Moitísimos Parabéns!!!

Ao remate deste concerto, todas as persoas participantes recibiron un bonito agasallo conmemorativo.

 

FELIZ DÍA DAS LETRAS GALEGAS!!!

PROXECTO INTERCENTROS: "AS NOSAS CANTIGAS"

Nesta semana das Letras Galegas 2025, adicadas ás "Cantareiras e á poesía popular oral", queremos compartir con vós o resultado do traballo realizado sobre a procura de "As nosas cantigas", un proxecto no que participamos 21 centros educativos de toda Galicia. Aínda que botou a andar hai uns meses, por fin podemos compartilo con todas e todos vós!

Abaixo podedes acceder ao documento e gozar coas diferentes aportacións dos máis de dous mil nenos e nenas que, xunto coas súas familias, veciñanza e amizades, fixeron este traballo de memoria tan especial. A finalidade: recordar aquelas cantigas, ditos, refráns, xogos de botar a sortes, cancións... que lles cantaban e contaban as súas nais, avoas e bisavoas, co obxectivo de manter viva a nosa tradición oral e darlle unha homenaxe ás nosas cantareiras. 

Agradamos que vos guste e moitas grazas por participar! 

Feliz semana das Letras Galegas 2025!

HISTORIAS DE CINE NO DÍA DO LIBRO

No marco da conmemoración do Día do Libro, gozamos hoxe de dúas magníficas funcións relacionadas co tema do noso PDI "O cine"que correron a cargo de Raquel Queizás.

 

O alumnado de Infantil, 1º, 2º e 3º de Primaria acudíu á representación de "Cinema Maravillas. Ver para Ler" no que que descubriron catro contos clásicos da literatura a través de adaptacións de cine mudo. Grazas a diversas técnicas cinematográficas gozamos do inxeño de Queliña mergullada nestes contos.

 

Pola súa banda, o alumnado de 4º, 5º e 6º de Primaria coñeceu de primeira man a figura de Alice Guy como precursora cineasta e contadora de historias, na función que leva por título "Cinema de historias da man de Alice Guy"

 

Pasámolo de cine! 

Moitísimas grazas!

DO LIBRO ÁS LETRAS. 21 DÍAS EN GALEGO

Baixo este nome recollemos as actividades que se desenvolven no centro entre dúas datas de gran relevancia: O Día do Libro (23 de abril) e o Día das Letras Galegas (17 de maio).

 

No calendario podedes comprobar a gran variedade de propostas para estas semanas nas que o equipo de "axudantes de Biblioteca", especialmente o alumnado de 6º curso, ten unha importante participación como alumnado colaborador. 

Tríptico: DO LIBRO ÁS LETRAS de COLE DE BARRO

VISITAMOS A BIBLIOTECA PÚBLICA

Ao longo desta semana o alumnado de Infantil e Primaria visitou a Biblioteca Pública para desenvolver actividades variadas con motivo da conmemoración do Día do Libro.

Este ano e contando coa colaboración do Club de lectura "Un ollo de vidro" dispuxeron para nós dun "alcoubo" de palabras características e peculiares da nosa zona que quixeron rescatar e poñer en valor para dar a coñecer entre a cativada e evitar así a súa perda.

 Así mesmo e dado que este 2025 se celebra o Ano Castelao, tiveron a oportunidade de afondar na bibliografía deste polifacético autor.

 

 Moitísimas grazas por esta fermosa actividade!

Parabéns ao Clube de lectura pola iniciativa!

 

O CORVO DE CORALIA

 Na mañá de hoxe recibimos a Xosé M. Fernández Abraldes (Alcalde de Barro) para presentarnos á que por primeira vez é mascota do entroido en Barro.

Repartido en dous grupos, todo o alumnado do centro reuniuse no ximnasio para coñecer de primeira man a súa historia, pois parece ser que aló polos anos 60 do pasado século XX había no lugar d'O Curuto en Barro un corvo moi popular chamado "Paco", rescatado do olvido como figura carnavalesca: "O corvo de Coralia" 

 

CANTAREIRAS, CONTADA POLA IGUALDADE

 Esta semana todo o alumnado do centro gozou dunha contada moi especial a cargo do colectivo Polo Correo Do Vento. Esta actividade está promovida polos Servizos Sociais do Concello de Barro dentro do Programa do Pacto de Estado Contra a Violencia de Xénero.

En catro sesións, unha para cada un dos ciclos educativos do centro, escoitamos a Carlos Taboada como emocionado contacontos,  Alba Faro e Marcelo Dobode entusiastas "cantareiras" e acompañados de Tania Solla coas súas magníficas ilustracións.

 

 

 Interesantísimas e constructivas xornadas!

Moitísimas grazas!