Blog dos Equipos de Biblioteca e de Dinamización da Lingua Galega do CEIP Amor Ruibal. San Antoniño, Perdecanai. 36194 - BARRO (Pontevedra - Galicia)
Mira o cartel inicial para saber as películas que trataremos. Con cada película descubriremos cada día unha muller relevante do mundo do cine.
Animádevos a participar!
Do 8 ao 18_Descobre as peliculas de Cole de Barro
Na presentación que está máis abaixo, cada día aparecerá unha nova páxina coas pistas necesarias para ir coñecendo a todas elas.
Mulleres de Cine de Cole de Barro
En catro sesións, unha para cada un dos ciclos educativos do centro, escoitamos a Carlos Taboada como emocionado contacontos, Alba Faro e Marcelo Dobode entusiastas "cantareiras" e acompañados de Tania Solla coas súas magníficas ilustracións.
Interesantísimas e constructivas xornadas!
Moitísimas grazas!
Para conmemorar esta data, e baixo o lema "8M SEMPRE" todo o alumnado de Infantil colaborou para crear este magnífico mural que estará pendurado na porta principal do edificio do Concello.
O lema vai acompañado de ilustracións que reflicten mulleres traballadoras en campos que adoitaban ser masculinos.
Moitas grazas artistas!
Feliz Día da Muller!
Na mañá de hoxe estivo no centro "Manuela Contacontos" para desenvolver unha intensa e interesante xornada de contacontos na que participou todo o alumnado do centro.
O espectáculo está baseado nos libros de Raquel Díaz Reguera: "¿Hay algo más aburrido que ser una princesa rosa?" e "Cuando las niñas vuelan alto" e o seu obxectivo é o de promover a igualdade e a busca da identidade persoal en nenos e nenas.
Moitísimas grazas!!
Na tarde de hoxe, o CEIP Amor Ruibal acolleu a actuación Os Bolechas falan das familias, financiada polo Ministerio de Igualdade a través da Secretaría Xeral de Igualdade da Xunta de Galicia, no marco do proxecto Facemos Corresponsabilidade 2023.
De forma lúdica e didáctica, o público asistente foi partícipe dunha posta en escena co obxectivo de poñer en valor a diversidade familiar e interiorizar a necesidade de colaborar nas tarefas da casa. E ata nos agasallaron cuns contos e cadernos!
Moitísimas grazas!!!
O Concello de Barro convoca Concurso para deseñar o lema e logo contra a violencia de xénero.
Os traballos deben ser novos, libres de dereitos. Non podendo presentarse imaxes xa existentes.
As obras presentadas non poden ser discriminatorias por razón de sexo, polo que se debe facer uso non sexista da linguaxe e garantir presenza equilibrada de ambos os dous sexos.
- Formato/Soporte: jpg, png ou papel/cartulina.
- Técnica e cor: libre.
- Lema: Máximo 6 palabras.
- Poden ser traballos individuais ou en grupos.
- Non se admiten traballos con nome das persoas autoras. Na parte de atrás da obra escribirase código coa aula e o número de lista.
Presentación e plazo:
- Na Biblioteca do CEIP Amor Ruibal
- Ás 12:00 horas do mércores, día 15 de novembro.
Animádevos a participar!
Todo o alumnado do CEIP Amor Ruibal recibiu hoxe a Celtia Figueiras de A Xanela do Maxín para presentar (en catro pases adaptados ás idades das nenas e nenos) o seu fantástico espectáculo Lúa quere viaxar... a Marte!!!
A maioría do alumnado de Primaria xa coñecía a Celtia pois estivo hai dous anos cos seus monicreques para contármonos U-la Lúa?
Neste novo encontro, Lúa volveu facer as delicias de todas e todos cunha nova aventura que xira arredor dos valores do esforzo, a igualdade e a perseverancia.
Grandísimo pracer, Celtia!!!
Moitísimas grazas!!!
No marco do Programa do Pacto de Estado pola Igualdade, promovido polos Servizos Sociais do Concello de Barro, onte e hoxe recibimos a visita de Raquel Queizás para deleitármonos cunhas fantásticas sesións de educación en igualdade.
O luns tocoulle o turno ao alumnado de Primaria, que gozou a tope con Travesías, un marabilloso espectáculo de narración oral con monicreques, obxectos e contos que transmiten valores de igualdade, de respecto e convivencia entre nenas e nenos e entre mulleres e homes.
E hoxe, as nenas e nenos de Infantil pasárono pipa nos divertidísimos obradoiros Xogando en Igualdade, co obxectivo claro de rachar cos estereotipos e prexuízos sexistas dende idades temperás e construír entre todas e todos un mundo mellor.
MOITÍSIMAS GRAZAS!!!
O noso alumnado recibiu hoxe uns bonitos puntos de lectura pola súa grandísima e boísima participación no xogo de pistas "Do 8 ao 18" desenvolvido no marco da conmemoración do Día da Muller.
MOITÍSIMOS PARABÉNS!!!
Animádevos a participar no xogo de pistas que este ano propoñemos para conmemorar o Día da Muller.
Baixo o lema de "Mulleres inventoras, mulleres sabedoras" atoparedes 7 inventos que estas fantásticas mulleres descubriron ao longo da historia.
No marco da conmemoración do Día Internacional da Muller, hoxe visitounos Cris de Caldas para desenvolver na nosa Biblioteca unhas fantásticas sesións de contacontos centradas no tema da igualdade e adaptadas ao nivel do alumnado. A actividade está promovida polos Servizos Sociais do Concello de Barro e forma parte do Programa do Pacto de Estado pola Igualdade.
Con moito humor, amor e diversión, as nenas e nenos de Infantil e Primaria gozaron con `Rosa non é unha cor´, `Contos en lila´, `As lavandeiras e as pitas zombies´ e moitas historias máis.
Unha ledicia aprender así!!!
Moitísimas grazas!!!
Hoxe, 8 de marzo, Día Internacional da Muller, todo o alumnado de Infantil e Primaria participou nas Contadas pola Igualdade a cargo de Cris de Caldas. A actividade está promovida polos Servizos Sociais do Concello de Barro dentro do Programa do Pacto de Estado pola Igualdade.
Ademais, no día de hoxe arrancou unha nova edición do xogo de pistas "Do 8 ao 18" que leva por título "Mulleres inventoras, mulleres sabedoras" en consonancia co PDI deste curso "Os inventos".
Prestade moita atención aos taboleiros da Biblioteca que están nos corredores porque cada día atoparedes aí as pistas necesarias para investigar e saber quen é quen!
Completar as fichas ten recompensa!
Fantástico vídeo de alumnado de 6º de Primaria para conmemorar o Día Universal da Infancia 2022, divulgando os dereitos das nenas e dos nenos, recollidos na Declaración dos Dereitos da Infancia de 1959 e na convención sobre os Dereitos da Infancia de 1989, o tratado internacional máis ratificado da historia.
Ademais, como aínda estamos a celebrar o Xacobeo 2022, as mozas e mozos de 6º agasallaron a todo o alumnado e persoal docente e non docente do centro con cunchas rotuladas con corazóns vermellos e a lenda "20-N", como recordo deste día e símbolo do necesario que é o correcto cumprimento destes dereitos para que todas as nenas e todos os nenos teñan unha gozosa peregrinaxe pola vida.
Que así sexa!!!
O alumnado de 3º, 4º, 5º e 6º de Primaria acudiu hoxe á Nave da Música do Concello de Barro para gozar do espectáculo Hoje venho falar de mim, unha fermosa peza de danza contemporánea de Myriam González, no marco do programa MULLERES EN ACCIÓN: VIOLENCIA ZERO da Deputación de Pontevedra.
A obra trata, cunha sensibilidade exquisita, o tema da identidade e a reivindicación do valor individual a través dunha protagonista que se encontra con todas as eu do seu pasado. No espazo sonoro puidemos escoitar as máxicas voces do alumnado de 6ºB, gravadas hai unha semana no interesante obradoiro que a artista impartiu no noso colexio.
O alumnado seguiu con moito interese e atención a representación e, unha vez rematada, tivo a oportunidade de compartir abertamente as súas impresións e reflexións, entablando un diálogo moi enriquecedor coa propia artista, no que quedou patente que a súa mensaxe chegou con absoluta claridade.
Moitísimos Parabéns!!!
Moitísimas Grazas!!!
O programa MULLERES EN ACCIÓN: VIOLENCIA ZERO da Deputación de Pontevedra chegou este luns ao colexio de Barro da man da bailarina e coreógrafa Myriam González, quen impartiu ao alumnado de 6º B un interesante obradoiro que forma parte do proxecto Hoje venho falar de min.
Dun xeito guiado e improvisado, as mozas e mozos iniciáronse na danza urbana Waacking como paso previo para reflexionar sobre un tema de vital importancia como é o da identidade.
O alumnado participou con moita atención e curiosidade e respondeu á pregunta "quen son?" dun xeito ben creativo e imaxinativo. As conclusións finais recolléronse nun audio que formará parte do espazo sonoro do espectáculo de danza que a artista ofrecerá o vindeiro martes 11 de outubro na Nave da Música.
A actividade está promovida pola Deputación de Pontevedra en colaboración co Concello de Barro.
Moitísimas grazas!!!