Recomendacións lectoras para este Nadal.

O trimestre chega ao seu fin e, co descanso do Nadal, chegan tamén as nosas recomendacións na guía de lecturas que elaboramos na biblioteca.

Guia Nadal 2019 by Amor Ruibal on Scribd

Visita do Apalpador e da Apalpadora

Hoxe recibimos con ilusión a visita do Apalpador e da Apalpadora, unha iniciativa da Deputación de Pontevedra na que participa o Concello de Barro.

Estas figuras míticas do Nadal galego, acompañadas dun acordeonista, dun guitarrista e dun burro fariñeiro fixeron as ledicias do noso alumnado con cancións, bailes, anécdotas e moita, moitísima diversión, transmitindo valores tan importantes como a igualdade, o respecto pola natureza, o coidado do medio ambiente e hábitos de alimentación saudable.

Moitísimas grazas!!!

Bo Nadal!!!

Sesións de contacontos con Cris De Caldas

No marco do Programa para o Fomento da Igualdade que estamos a desenvolver no centro ao longo deste curso escolar, o equipo da Biblioteca organizou tres sesións de contacontos para o alumnado de Primaria con Cris De Caldas.

De 1º a 4º de Primaria, o alumnado gozou da sesión `Rosa non é unha cor...´ na que Cris desenvolveu con moito humor tres contos sobre a igualdade:

• `Ferdinando, o touro´ de Munro Leaf.
• `As cores´. Adaptación de Cris de Caldas, inspirada no conto homónimo incluído no libro `Contos para antes de espertar´ de Nunila López Samanero.
• `A historia dos bonobos con lentes´ de Adela Turín.

Pola súa banda, o alumnado de 5º e 6º de Primaria tivo o pracer de participar na sesión `Contos en lila´ sobre os rols de xénero e como desmontar algúns deles, ao través de catro historias:

• `A princesa vestida cunha bolsa de papel´ de Robert Munsch.
• `Unha Carapuchiña Vermella´ de Marjolaine Leray.
• `Simón, o chorón´ de Cris de Caldas.
• `As lavandeiras rebeldes´ de John Yeoman e Quentin Blake.

As sesións desenvolvéronse nun ambiente tan dinámico como divertido e contaron coa colaboración de todo o alumnado. Ao final, Cris escribiu unha fermosa dedicatoria no libro de sinaturas da Biblioteca. 

Grandísimo pracer, Cris!!!

Moitísimas grazas!!!

Tradicional visita de Papá Noel

Esta mañá recibimos a tradicional visita de Papá Noel, que veu cargadiño de regalos para repartir entre todas as crianzas de Infantil pola súa fantástica participación no XIX Concurso de Postais de Nadal, convocado polo Concello de Barro ao través da OMIX.

Mantivo, ademais, uns entrañables encontros co alumnado de Primaria, a quen entregou lamberetadas que foron moi ben recibidas.

A actividade estivo organizada polo Concello de Barro e a OMIX.

Moitísimas grazas!!! 

Resolución do XIX Concurso de Postais de Nadal

O Concello de Barro ao través da OMIX vén de publicar o cartaz coa resolución do XIX Concurso de Postais de Nadal.

Parabéns ás persoas gañadoras!!!

Moitísimas grazas a todas as persoas participantes!!!

As postais premiadas do noso centro son:

2ª Categoría : UXÍA OCAMPO GONZÁLEZ (1º B)

3ª Categoría: IRIA GARCÍA PAZ (4º A)

4ª Categoría: CANDELA VÁZQUEZ GONZÁLEZ (6º B)

7ª Categoría (Equipo):  FRANCISCO XOSÉ GÓMEZ FOLGAR (pai) e SARA GÓMEZ CASTRO (filla)

Somos iguais

O alumnado de Infantil participou hoxe na sesión de contacontos `Somos iguais´ protagonizada por Raquel Queizás. A actividade, organizada polo equipo da nosa Biblioteca, enmárcase no Programa para o Fomento da Igualdade, que estamos a desenvolver no centro neste curso escolar.

As nosas crianzas seguiron con moitísima atención e diversión os tres contos que Raquel interpretou con moita arte e sabedoría:

• `Arturo e Clementina´ de Adela Turín.
• `A metade de Xan´ de Gemma Lineas.
• `¡Mesa, trágame!´ de Gabriela Keselman.

Antes da despedida, Raquel Queizás deixou a súa pegada no libro de honra da nosa Biblioteca.

Grande, Raquel!!!

Moitísimas grazas!!!

Concerto Didáctico de Música Tradicional

Todo o alumnado do centro gozou antes de onte dunha fantástica viaxe pola tradición musical de Galicia da man de Felipe Rea e Inés Tilve, pai e nai do noso alumno Fiz. Gaitas, clarinete, pandeireta, pandeira, mais tamén cunchas, culleres, cuncas, unha tixola, un prato, unha cabaza, un sacho, unha peneira, unha mesa... soaron e resoaron en perfecta combinación musical, demostrando que aparellos, obxectos ou apeiros de labranza, ademais de cumprir a súa función, teñen un son natural ideal para o acompañamento musical. 

O entusiasmo animou a nenos e nenas a probalos con gran divertimento, non faltando tampouco unha parella voluntaria que soubo puntear moi ben unha muiñeira.

Un concerto marabilloso!!!

Moitísimas grazas!!!

150 Aniversario do Nacemento de Amor Ruibal

No marco das actividades programadas polo Concello para conmemorar o 150 aniversario do nacemento de Ángel Amor Ruibal, o alumnado de 5º e 6º de Primaria asistiu na nosa Biblioteca a unha charla impartida por D. Ángel Alfonso Piñeiro, veciño, mestre xubilado (moitos anos destinado no noso centro) e avó dunha alumna.

D. Ángel contou anécdotas e datos importantes da vida e obra de Amor Ruibal, persoeiro ilustre que dá nome ao noso centro e tamén ao grupo de danzas tradicionais de Barro. Falou da súa grande preparación e da importancia que tivo na súa época como pensador, filólogo, teólogo e escritor. Acompañou a charla cuns dípticos informativos que repartiu entre o alumnado e escribiu unha bonita dedicatoria no libro de sinaturas da Biblioteca.

Encantounos!!!

Moitísimas grazas!!!

XIX Concurso de Postais de Nadal

O Concello de Barro a través da OMIX (Oficina Municipal de Información Xuvenil) ven de convocar o tradicional Concurso de Postais de Nadal, no que poden participar as persoas que estuden ou vivan en Barro.

Prestade especial atención aos seguintes aspectos:                                                             

• Empregade o impreso facilitado pola organización.
• O tema é libre.
• De levar texto, o idioma a empregar é o galego.
• Non pode levar o nome escrito. 
• As postais presentadas no colexio levarán na parte posterior o curso e número de lista (que facilitarán as titoras).
• As postais da categoría "en equipo" (familiares e/ou amizades ata un máximo de 3 persoas) levarán na parte posterior as idades e parentesco.

As postais presentaranse na Biblioteca do CEIP Amor Ruibal antes das 14:00 h do venres 13 de decembro ou no rexistro do Concello de Barro ata o luns 16 de decembro.

Animádevos a participar!!!

Concentración 25N

Neste 25 de Novembro, autoridades municipais, veciñanza e a comunidade educativa do CEIP Amor Ruibal uniron as súas voces no Salón de Actos da Biblioteca Pública para rexeitar todo tipo de violencia contra as mulleres e reivindicar a necesidade de practicar o `ben querer´ e o `bo trato´ fronte ao `mal querer´ e o `maltrato´.

As cancións Que canten os nenos de José Luis Perales e Casandra de MJPérez resoaron con forza nas paredes do Salón, que vibraron como nunca co desexo dun mundo mellor.

A chuvia impediu aos nenos e nenas de Infantil asistir ao acto mais sumáronse tamén á conmemoración, cantando e alzando nas aulas as súas mans violetas contra a violencia.

Quen ben me quere...

No marco da conmemoración do 25N, Día Internacional pola eliminación da violencia contra as mulleres, todo o alumnado do centro decorou paredes e portas coas súas propias reflexións sobre o significado do `ben querer´, dándolle unhas cantas voltas ao famoso refrán `Quen ben te quere farate chorar´.

Así, a partir da premisa `Quen ben me quere...´ saíron nas aulas unha chea de ideas das que foron seleccionadas, por consenso entre o alumnado, as seguintes:

• 3 anos: `Quen ben me quere faime sorrir´.
• 4 anos: `Quen ben me quere cólleme da man´.
• 5 anos: `Quen ben me quere escríbeme cartas de amor´.

     

• 1º A: `Quen ben me quere faime brillar´.
• 1º B: `Quen ben me quere faime rir´.

• 2º A: `Quen ben me quere faime feliz´.
• 2º B: `Quen ben me quere dáme bicos´.

• 3º A: `Quen ben me quere cóidame moito´.
• 3º B: `Quen ben me quere faime sentir ben´.

 

• 4º A: `Quen ben me quere faime loitar´.
• 4º B: `Quen ben me quere faime voar´.

  

• 5º A: `Quen ben me quere trátame ben´.
• 6º A: `Quen ben me quere dáme bos consellos´.
• 6º B: `Quen ben me quere faime soñar´.

  

Os avós contan, na Biblioteca Pública

Como ven sendo habitual durante o mes de novembro, e tal como contamos nunha entrada anterior, o alumnado do centro visitou a Biblioteca Pública de Barro.

Esperaban impacientes Élida Arzúa, Mª Dolores Sarrapio e Xan Rey que, con moita ilusión, prepararan para a cativada os contos "Andando polo camiño", "A casa da mosca chosca" e "Animais de compañía".

Despois de escoitar con moita atención os contos elexidos para cada grupo, fixemos audicións da famosa composición de Camille Saint Saëns "O entroido dos animais" e tivemos que adiviñar de que animal se trataba. Por último, Pili e Mónica propuxéronnos facer diversas actividades relacionadas coa temática da correspondente peza musical.

Ofrecemos un vídeo resumo do acontecido nestas visitas.

Moitísimas grazas!

Concentración polo 20N e 25N

Hoxe enviamos ás familias do noso alumnado unha carta na que citamos a toda a comunidade educativa e veciñanza a unha concentración para conmemorar o 20N, Día Universal da Infancia, e o 25N, Día Internacional da Eliminación da Violencia contra a Muller.
Terá lugar o vindeiro venres, día 22, no Salón de Actos da Biblioteca Pública Municipal ás 12:15h.

Convocan: Concello de Barro, CEIP Amor Ruibal e ANPA Amor Ruibal.

Animádevos a participar!

Contamos con vós!

Día Universal da Infancia

Hoxe, 20 de Novembro, é o Día Universal da Infancia e no noso centro desenvolvemos actividades variadas de lectoescritura, plástica e musicais para lembrar que os dereitos dos nenos e das nenas son (deberían ser) universais porque

as crianzas son o noso futuro!

Celebración do Magosto

Onte gozamos da nosa festa do Magosto con xogos tradicionais (os birlos, sementa e apaña, esquiva a castaña, carreiras de relevos, papa castañas, pesca castañas, apaña castañas, transporta castañas, castaña, onde estás?...), bailes, cancións e degustación de saborosas castañas grazas á colaboración de todas as familias que aportaron as castañas e dos familiares de Estefanía, Melody, Wendy e Chemita, que as asaron nas súas locomotoras.

Moitísimas grazas!!!