VISITAMOS A BIBLIOTECA PÚBLICA

Ao longo desta semana o alumnado de Infantil e Primaria visitou a Biblioteca Pública para desenvolver actividades variadas con motivo da conmemoración do Día do Libro.

Este ano e contando coa colaboración do Club de lectura "Un ollo de vidro" dispuxeron para nós dun "alcoubo" de palabras características e peculiares da nosa zona que quixeron rescatar e poñer en valor para dar a coñecer entre a cativada e evitar así a súa perda.

 Así mesmo e dado que este 2025 se celebra o Ano Castelao, tiveron a oportunidade de afondar na bibliografía deste polifacético autor.

 

 Moitísimas grazas por esta fermosa actividade!

Parabéns ao Clube de lectura pola iniciativa!

 

AS VERBAS QUE CONTAN 2025

 

O Concello de Barro convoca un ano máis, a través da OMIX e da Biblioteca Pública o concurso de creación literaria "AS VERBAS QUE CONTAN" no marco da conmemoración das Letras Galegas 2025.

Modalidade: 

Prosa (conto ou microrrelato)

Verso (acróstico, caligrama, haiku ou poema de formato libre).

Todos os traballos deben ser orixinais, inéditos e en galego. Deben seguir as condicións específicas segundo idade e categoría.

Forma de entrega e identificación: 

Soportes dispoñibles na OMIX e nos centros educativos.

Identificación segundo o tipo de obra e iniciais da persoa autora ( ademais do curso e nº de orde)

Presentación de traballos:

Podedes participar presentando na Biblioteca do noso centro, un conto e/ou poema  con data límite o mércores 30 de abril.

Máis información e bases completas na sede electrónica do Concello de Barro (Apartado ANUNCIOS): https://barro.sedelectronica.gal/info.0 

 

Agardamos as vosas creacións!

Ánimo, artistas!!!

DÍA DA SAÚDE 2025

 Cada 7 de abril, conmemórase o Día Mundial da Saúde. Este ano 2025, a Organización Mundial da Saúde (OMS), centra as reivindicacións no lema "COMEZOS SAUDABLES, FUTUROS ESPERANZADORES"

Con dita campaña, preténdese defender os dereitos de todas as mulleres, familias e neonatos, en todas as partes do mundo, a ter acceso a servizos de saúde, educación e información de calidade.

 

Desde o noso centro sumámonos á OMS para reivindicar a importancia da saúde, dos estilos de vida saudable e da asistencia sanitaria universal. Para iso, a través do Proxecto de Prevención das Condutas Aditivas dos Concellos de Barro, Campolameiro, Cuntis, Moraña e Portas, convidamos ás familias á lectura do Manifesto que se achega a continuación, así como a seguir os 7 hábitos clave que desde a OMS se consideran determinantes para ter unha vida máis saudable.

 

MOCHILAS VIAXEIRAS SAUDABLES

Este proxecto, no que colaboran os Equipos de Biblioteca, EDLG e PVAD (Proxecto de Vida Activa e Deportiva), botou a andar a comezo deste trimestre. Cada semana as mochilas, cargadiñas de xogos e libros de distintas temáticas, buscan un novo fogar. O seu obxectivo é o de fomentar e aumentar o tempo de xogo, actividade física así como a experimentación da cativada e preferiblemente... en familia.

Trátanse de 10 Mochilas Viaxeiras Saudables nas Aulas de Primaria:

 

 

Así como as Mochilas Saudables para as Aulas de Infantil (6º de EI no 2º Trimestre)

 

 Grazas familias pola vosa colaboración!

 

FESTA DA LINGUA 2025

 O 16 de maio, venres, no marco da conmemoración das Letras Galegas terá lugar a Festa da Lingua 2025.

Data: 16 de maio, venres. A partir das 10:30 hs

Lugar: Aparcamento da Tafona

Este acto está organizado por Terras do Umia, a Coordinadora Comarcal de Equipos de Dinamización da Lingua Galega dos Centros educativos da comarca (Barro, Caldas, Cuntis, Moraña e Portas) e coa colaboración do Concello de Caldas de Reis.

Haberá entregas de recoñecementos, contacontos, recitais poéticos e música. O acto estará aberto a familias e público en xeral.

Animádevos a participar!

 

PILABOT: RECOLLIDA DE PILAS E BATERÍAS

 Estamos xa no ecuador do Concurso de reciclaxe de pilas, baterías e acumuladores, "PILABOT", convocado pola Xunta de Galicia, xunto a Ecopilas, Ecolec. 

Temos xa un colector cheo, imos polo segundo. 

Animádevos a colaborar con nós no coidado do medioambiente e na xestión destes residuos altamente contaminantes. Seguiremos coa recollida ata final de curso.

 

Moitísimas grazas familias pola vosa implicación!

2A: DÍA DA CONCIENCIACIÓN SOBRE O AUTISMO

 

Cada 2 de Abril, ademais do Día do Libro Infantil e Xuvenil, conmemoramos o Día Mundial da Concienciación Sobre o Autismo para dar visibilidade e coñecer mellor ás persoas que o padecen.

No seguinte "canva" podedes atopar o cartel conmemorativo e dúas páxinas que conteñen enlaces a curtas de vídeo así como a varias recomendacións e propostas de lecturas sobre esta temática.

 

Día do Autismo 2025 de Cole de Barro

 

Na mañá de hoxe e buscando dar visibilidade a esta data, todo o alumnado e profesorado saimos ao corredor exterior de entrada ao centro para atar lazos de cor azul nas barandas que loceran estes días.

 

 

 

 

OBRADOIROS FAMILIA E SAÚDE

 O Concello de Barro, a través do Proxecto de Prevención das Condutas Adictivas, realizará o mércores 2 de abril un Obradoiro en Liña de Prevención de Condutas Alimentarias de Risco no Ámbito Familiar. Alimentándonos de Saúde.

INSCRÍBETE

 

 

Con este obradoiro búscase informar e dar ferramentas ás familias para a xestión da adolescencia, aumentar o seu coñecemento sobre as condutas de risco, e promover unha mellor educación nutricional e alimentaria coa que previr trastornos da conduta alimentaria entre as súas crianzas.

A sesión será realizada en liña por personal especializado da UNAF (Unión de Asociacións Familiares)

ANIMÁDEVOS!

A vosa presenza é moi importante.

 

Onde?     En liña

Cando?   O mércores 2 de abril. De 18:30 A 20:00 hs.

Inscrición: Clicando a continuación ou no cartel en "INSCRÍBETE" 

Posteriormente recibiredes un enlace de acceso ao taller (Zoom)

 

 

O CORVO DE CORALIA

 Na mañá de hoxe recibimos a Xosé M. Fernández Abraldes (Alcalde de Barro) para presentarnos á que por primeira vez é mascota do entroido en Barro.

Repartido en dous grupos, todo o alumnado do centro reuniuse no ximnasio para coñecer de primeira man a súa historia, pois parece ser que aló polos anos 60 do pasado século XX había no lugar d'O Curuto en Barro un corvo moi popular chamado "Paco", rescatado do olvido como figura carnavalesca: "O corvo de Coralia" 

 

DO 8 ao 18. MULLERES DE CINE

 

Este ano propoñemos un xogo de pistas que busca descubrir ás mulleres a través das películas polas que foron recoñecidas.

Mira o cartel inicial para saber as películas que trataremos. Con cada película descubriremos cada día unha muller relevante do mundo do cine.

Animádevos a participar! 

 

 

Do 8 ao 18_Descobre as peliculas de Cole de Barro

 

Na presentación que está máis abaixo, cada día aparecerá unha nova páxina coas pistas necesarias para ir coñecendo a todas elas.  

 

 

Mulleres de Cine de Cole de Barro

 

CANTAREIRAS, CONTADA POLA IGUALDADE

 Esta semana todo o alumnado do centro gozou dunha contada moi especial a cargo do colectivo Polo Correo Do Vento. Esta actividade está promovida polos Servizos Sociais do Concello de Barro dentro do Programa do Pacto de Estado Contra a Violencia de Xénero.

En catro sesións, unha para cada un dos ciclos educativos do centro, escoitamos a Carlos Taboada como emocionado contacontos,  Alba Faro e Marcelo Dobode entusiastas "cantareiras" e acompañados de Tania Solla coas súas magníficas ilustracións.

 

 

 Interesantísimas e constructivas xornadas!

Moitísimas grazas!

8M, Día da Muller

 Para conmemorar esta data, e baixo o lema "8M SEMPRE" todo o alumnado de Infantil colaborou para crear este magnífico mural que estará pendurado na porta principal do edificio do Concello.

O lema vai acompañado de ilustracións que reflicten mulleres traballadoras en campos que adoitaban ser masculinos.

 

 Moitas grazas artistas!

Feliz Día da Muller!

ENTROIDO ... DE CINE

Ao longo desta semana e como vén sendo costume no centro, MIMI, a mascota da Biblioteca, presentou diariamente os mandados que seguimos con moita ilusión.

O mandado do xoves facía alusión ao noso PDI "Cine de Barro" e por esta razón cada ciclo ou nivel caracterizouse seguindo a temática do mesmo. Ese día fixemos un pequeno desfile desde o centro ata a explanada diante do pavillón, onde nos agardaban familiares para acompañar o noso percorrido.

 

Chegado o venres, puidemos gozar novamente cun desfile, baile e moitísima ilusión por mostrar os nosos disfraces favoritos.

 

FELIZ ENTROIDO!

Moitísimas grazas pola vosa colaboración!