"DO 8 AO 18: BD-MULLERES GALEGAS"

Moito xogo deu o mural que temos no patio BD DAS MULLERES GALEGAS! 

Co motivo da conmemoración do Día Internacional da Muller, a caseta onde está pintado o fermoso mural converteuse, do 8 ao 18 de marzo, nun lugar de gozosa peregrinaxe e punto de partida dunha apaixonante viaxe de investigación para todo o alumnado do colexio. Alí ían cada día na procura de respostas a cuestións, diferenciadas por idades, plantexadas polos equipos da Biblioteca e Dinamización da Lingua Galega sobre as 7 mulleres galegas retratadas: Ángeles Alvariño, María Victoria Moreno, Isabel Zendal, Maruja Mallo, Ángela Ruiz Robles, Ernestina Otero e Antonia Ferrín.  Mulleres moi significativas e auténticos referentes para todas e todos nós, sobre as que logo pescudaron nas respectivas aulas.

Soamente queda agradecer a todo o alumnado e profesorado de Infantil e Primaria a súa magnífica participación, ao Concello de Barro, por promover a iniciativa do mural no noso centro, e a Quique Mauricio e Carlos Taboada de Polo Correo do Vento, por seren os artistas que deseñaron e debuxaron a fermosa obra con propostas didácticas incluídas.

Grandísimo pracer é aprender gozando e gozar aprendendo!

MOITÍSIMAS GRAZAS!!!

DÍA INTERNACIONAL DA MULLER: "DO 8 AO 18"

Hoxe, 8 de marzo, Día Internacional da Muller, presentamos a todo o alumnado de Infantil e Primaria o xogo de pistas "Do 8 ao 18" co obxecto de investigar, ata o dezaoito de marzo, sobre a vida e obra de 7 importantes mulleres galegas. Todas elas están moi ben debuxadas no fermoso mural "BD-MULLERES GALEGAS" que temos no patio, deseñado e realizado por Carlos Taboada e Quique Mauricio, integrantes de Polo Correo do Vento, que tamén fixeron unhas propostas didácticas moi interesantes que podedes ver a continuación.

BD Mulleres galegas Propostas de actividades by Amor_Ruibal on Scribd

 

Por mor da COVID, non podemos realizar a actividade conxuntamente pero cada día aparecerán pistas nos taboleiros dos corredores para que, en cada aula, se poida descubrir, coñecer e recoñecer unha a unha a estas grandes mulleres traballadoras galegas.

 

 

ENTROIDO 2021

Aquí deixamos algunhas imaxes do tempo de entroidar no CEIP Amor Ruibal que, coma sempre, veu marcado polos mandados de MIMI, a mascota da nosa Biblioteca.

Moitísimos Parabéns pola fantástica participación!!!

Moitísimas grazas, familias, pola vosa colaboración!!!

CARTAS E CONTOS POLA PAZ

O "Buzón da Paz", creado polo alumnado de Valores de 6º de Primaria e instalado na nosa Biblioteca co motivo da conmemoración do Día Escolar da Non Violencia e da Paz, encheuse rapidamente cunha morea de cartas que o alumnado de Infantil e Primaria máis Mimi, a mascota da Biblioteca, intercambiaron entre si con propostas moi intelixentes e sensatas para gozar das nosas relacións dun xeito pacífico e tolerante.

Asemade, a exposición bibliográfica de "Contos pola Paz" serviu de inspiración a nenas e nenos de Infantil e Primaria para desenvolver marabillosas actividades de creación artística e lectoescritura nas súas respectivas burbullas.

Moitísimos Parabéns pola magnífica participación!!!

Que os vosos desexos pacíficos se fagan realidade!!!

Máis información en 

Pequecholandia 

e no blog de 5º e 6º de Primaria.

Calendarios Saudables 2021

O Concello de Barro vén de entregar os CALENDARIOS SAUDABLES 2021 no CEIP Amor Ruibal, seguindo todos os protocolos sanitarios. 

A iniciativa, coordinada pola psicóloga Julia Búa, enmárcase no Proxecto de prevención de condutas adictivas no eido local de Cuntis, Barro, Campo Lameiro, Moraña e Portas, co obxecto de promover hábitos de vida saudable e previr futuras condutas adictivas entre o alumnado.

As fermosas ilustracións do calendario son froito do Certame de Debuxos Saudables 2019 e da convodatoria online "Xunt@s creamos saúde" lanzada o Día Mundial da Saúde 2020, en pleno confinamento.

Do noso centro, resultaron seleccionados os debuxos de Sabela García Rey (Xaneiro), Iria García Paz (Agosto) e Sara Fernández Alfonso (Setembro).

MOITÍSIMOS PARABÉNS!!!

XUNT@S CONSTRUÍMOS SAÚDE!!!

CALENDARIO SAUDABLE, 2021 by Amor_Ruibal on Scribd

Páxina do Proxecto de Prevención de Drogodependencias e outras Condutas Adictivas

Resolución do XX Concurso de Postais de Nadal

O Concello de Barro ao través da OMIX vén de publicar a resolución do XX Concurso de Postais de Nadal.

As postais premiadas do noso centro son:

Categoría A: IVÁN GAGO GARCÍA (2º A)

Categoría B: XIÁN IGLESIAS MAQUIEIRA (3º A)

Categoría D: LUCA VILA VITUREIRA (6º A)

Categoría G (Equipo): FIZ REA TILVE (1ºA), 

FELIPE REA (pai) e INÉS TILVE (nai)

A entrega de Premios terá lugar este sábado 26 de decembro ás 12:00 h na Biblioteca de Barro durante un acto moi breve ao que soamente poderán asistir as persoas premiadas para recoller os premios, cumprindo así con todas as medidas de seguridade e distancia.

Moitísimas grazas pola fantástica participación!!!

Parabéns ás persoas gañadoras!!!

XX Concurso de Postais de Nadal

O Concello de Barro, a través da OMIX (Oficina Municipal de Información Xuvenil), vén de convocar o XX Concurso de Postais de Nadal no que, seguindo a tradición, convídannos a participar.

Adxúntanse as bases, que presentan algunhas variacións debido á situación actual, priorizando a presentación dos traballos por correo electrónico.

   

                                                           

Prestade atención especial aos seguintes aspectos:

• As postais realizaranse nun tamaño de medio folio DIN-A4. Poden ser en branco e negro ou en cor.

• O tema é libre.

• De levar texto, o idioma a empregar é o GALEGO.

• Non poden levar o nome escrito. 

• As postais presentadas no colexio levarán na parte posterior o curso e número de lista (que facilitarán as titoras).

• Cada participante pode entregar un máximo de 2 postais.

• As postais da categoría "en equipo" (familiares e/ou amizades ata un máximo de 3 persoas) levarán na parte posterior as idades e parentesco.

As postais presentaranse na Biblioteca do CEIP Amor Ruibal antes das 14:00 h do martes 15 de decembro ou no rexistro do Concello de Barro a través da sede electrónica ou do enderezo electrónico omix@barro.es ata o mércores 16 de decembro (inclusive).

Animádevos a participar!!!

25N do 2020

O alumnado do CEIP Amor Ruibal desenvolveu estes días diversas actividades de sensibilización e concienciación no marco da conmemoración do 25N, Día Internacional da Eliminación da Violencia contra a Muller. 

E, ao son da canción POR ELAS de Adhara and Ritman, reivindica unha sociedade libre de violencia machista para

<<QUE `NINGHÉN´ DECIDA 

 CANDO SE ACABA A TÚA VIDA>>

Moitísimas grazas, familias, pola vosa colaboración!

Graciñas especiais ao alumnado de 6º de Primaria, 

autor da cartelería creada para a conmemoración, 

inspirada na letra da canción.

Día Internacional dos Dereitos da Infancia 2020

O 20 de novembro de 1989, na Asemblea Xeral das Nacións Unidas, aprobouse a Convención dos Dereitos da Infancia. Para celebrar este día, o alumnado de Valores de 6º curso de Primaria, que contou coa colaboración de todas as súas compañeiras e compañeiros na elaboración de carteis, crearon un vídeo con imaxes dos diferentes dereitos.

Esperamos que vos guste.

 

Mes da Ciencia en Galego na Biblioteca

 Novembro é un mes cheo de acontecementos na Biblioteca e o que nos ocupa agora é o anuncio, como un feitizo, do MES DA CIENCIA EN GALEGO NA BIBLIOTECA.

Presentámolo co texto que o profesor e investigador Xurxo Mariño elaborou a modo de Manifesto e que podedes descargar no seguinte enlace:

https://www.edu.xunta.gal/biblioteca/blog/files/Manifiesto%202020-V1.pdf