RECURSOS NA REDE

Ao longo desta semana o profesorado estivo traballando na elaboración dun repositorio de recursos dixitais para ofrecer ao alumnado.

Non está completo, queda traballo por facer, pero adiantamos xa o panel base deste repositorio desde o que poderedes acceder aos distintos apartados do mesmo.

Na zona superior sombreada enlaza con paneis similares a este (que seguiremos completando) que conteñen:

• Recursos educativos e Apps (Tamén específicas de alumnado de NEAE )
• Arte e Música
• Cine e Lectura
• English
• Traballos Manuais e Deporte/Baile
• Xogos interactivos (Das distintas áreas curriculares e de desenvolvemento das Competencias)

Completan este panel outros recursos e aplicacións educativas.

Agardamos vos sexan de utilidade.

Ánimo a todos e todas!

#euquedonacasa


 

HORARIO CORENTENA

O mestre Manuel Velasco publicou o domingo pasado a seguinte imaxe no seu blog "Ayuda para maestros". Na fotografía vemos o horario establecido na súa casa para esta corentena elaborado de xeito moi creativo ademais de conter actividades moi variadas.

A nós pareceunos unha boa idea de onde partir para a elaboración dos horarios ou da vosa rutina de tarefas para estas semanas na casa. Fixemos algunha adaptación pensando en alumnado de diferentes idades e propoñemos algo así:

Animádevos a planificar, deseñar e crear en familia vistosos horarios e sacádelle proveito a estes días en compañía das vosas pequenas e pequenos artistas!!!

Na páxina web do centro están colgadas as tarefas curriculares que suxiren as mestras de cada nivel ou ciclo para esta semana.

Aquí vos deixamos o enlace:

https://www.edu.xunta.gal/centros/ceipamorruibal/?q=node/118#attachments

(Os documentos están nos "adxuntos")

Engadiremos tamén propostas máis xerais, de desenvolvemento competencial, cun repositorio de recursos variados - en elaboración-

Moito ánimo a todos e a todas!!!

#euquedonacasa

 

XX + 1 SALÓN DO LIBRO

Hoxe ás 18:00 h bota a andar unha nova edición do Salón do Libro Infantil e Xuvenil de Pontevedra. Nas vindeiras semanas poderemos gozar dunha chea de actividades e obradoiros relacionados cos libros e a lectura.

https://www.salondolibro.gal/programacion-2020/

O tema deste ano é "O humor" e o  traballo do noso centro xa está nas salas da exposición. É un libro recompilatorio de refráns e ditos no que representamos de forma gráfica o seu significado literal.

Esta semana, antes de entregalo, o alumnado participante pasou pola Biblioteca do centro para retratarse co traballo.

O resultado gustounos moitísimo!! 

Parabéns, artistas!!

DÍA DE ROSALÍA 2020

Este ano sumámonos á iniciativa da Fundación Rosalía para homenaxear á nosa autora máis universal cun "Caldo de Gloria", inspirado no poema "Miña casiña, meu lar" de Follas Novas, a partir dun díptico no que recollemos o poema completo máis un glosario aclaratorio e puntos de lectura con estrofas escollidas.

Ademais, na Biblioteca, xuntámonos arredor dun pote galego para recitar e ler textos rosalianos.

Unha auténtica gozada!!!

DESFILE DE ENTROIDO 2020

O noso venres de Entroido encheu de alegría e color o patio escolar, que acolleu un animado e vistoso desfile para gozo e desfrute de alumnado e profesorado.

Moitísimos Parabéns pola fantástica participación!!!

Bo Entroido!!!

MANDADOS DE MIMI 2020

Os tradicionais mandados de MIMI. cos que arranca o noso Entroido escolar, xiraron este ano arredor dos temas que estamos a traballar no proxecto anual de centro: `BARRRO: Vivir e Convivir´.

O martes, mércores e hoxe, xoves, reunímonos no patio para falar, bailar, cantar, xogar, rir, gozar..., cumprindo cos mandados con moito enxeño, creatividade e alegría.

E mañá, no día grande do noso entroido, xa sabedes:

 Moitísimas grazas a todas as persoas implicadas pola vosa colaboración e participación!!!

Corrida do Galo 2020

Hoxe remataron no patio escolar as xornadas de demostración da `Corrida do Galo´, dirixidas ao alumnado de 4º, 5º e 6º de Primaria e organizadas polo noso Concello coa colaboración do profesorado de Ed. Física. 

Pili Álvarez, encargada da OMIX, explicou a orixe deste xogo tradicional co que dá comezo a programación do Entroido de Barro en todas as parroquias, para gozo e desfrute da veciñanza.

Aínda que conserva o mesmo nome, actualmente substitúese o galo por laranxas (non comestibles), ensartadas en varas anudadas por vimbios. As persoas xogadoras teñen que bater nelas cos ollos tapados ata lograr tiralas todas. Obxectivo que acadou entre risas o noso alumnado, que xogou en equipos e se divertiu a base de ben.

RECICLA CON PILABOT

Comezou a pasada semana a andaina do noso centro no Concurso de reciclaxe de pilas, baterías e acumuladores, PILABOT, convocado pola Xunta da Galicia, xunto a Ecopilas, Ecolec e ERP.

Con esta iniciativa pretendemos concienciar da importancia desta campaña acorde co noso Proxecto este curso: BARRRO vivir e convivir. Máis alá do premio (unha dotación económica para o centro para mercar material escolar, deportivo ou realizar actividades educativas), queremos animar a toda a comunidade educativa a participar con nós no coidado polo medioambiente, tamén na nosa localidade, Barro.

 

O alumnado de 4º nivel, responsable de poñer en marcha esta campaña, informou nas aulas sobre o concurso e repartíu as follas informativas e caixas colectoras de pilas para o alumnado de Primaria.

Tamén estiveron nas aulas de Infantil para contarlles que eles non poden participar no concurso traendo pilas nas súas mochilas, pero deixaron como agasallo unha ficha co debuxo da mascota do concurso elaborado por Martín.

Neste curto espazo de tempo temos xa un colector cheo,

imos polo segundo.

Moitísimas grazas a todos e todas pola vosa implicación!

DÍA DA PAZ 2020

Hoxe gozamos dun marabilloso Día Escolar da Non Violencia e Da Paz no CEIP Amor Ruibal coa participación de autoridades municipais, alumnado, profesorado e familias, que agradecemos de corazón. Por cuestións de espazo, primeiro tivo lugar o acto de Infantil e, logo do tempo de lecer, o de Primaria.

Este ano interpretamos a canción De ellos aprendí de David Rees, creada con frases de películas moi coñecidas e que conteñen valores fundamentais para unha convivencia pacífica. Unha desas frases, "cada día de chuvia ten o seu arcoíris" serveu de punto de partida para relacionar as 7 cores do arco da vella con 7 palabras que consideramos imprescindibles nunha cultura de paz, e que foron aportadas polo alumnado de Infantil e de cada nivel de Primaria coa consigna de que comezasen pola mesma letra que a cor correspondente. O resultado foi o seguinte:

Infantil: Violeta - Valentía.

1º: Añil - Amor.

2º: Azul - Amizade.

3º: Verde - Veracidade.

4º: Amarelo - Amabilidade.

5º: Laranxa - Liberdade.

6º: Vermello - Verdade.

7 Palabras máxicas para facer a PAZ os 7 días de todas as semanas do ano.

Moitísimas grazas pola participación!!!

BARRO: VIVIR E CONVIVIR EN PAZ