Entrega do X Premio MIMI

O venres 26 de outubro foi un día moi emotivo para a comunidade educativa do CEIP Amor Ruibal de Barro. Reunímonos na Nave da Música do Concello para entregar o X Premio MIMI a MAMÁ CABRA pola difusión da lingua e cultura galega a través das súas fermosas cancións.

Tomi López, Harry Price e Iago Rodríguez, tres integrantes do grupo, subiron ao escenario, xunto ao alumnado de 6º, responsable do proxecto, para recibir o Premio (unha talla en madeira de MIMI, a mascota da Biblioteca do colexio, feita polo artista Fran Rodríguez Remiseiro) e desenvolver animadas actuacións musicais seguidas con grande entusiasmo por todo o auditorio.

É o broche de ouro a un grandísimo traballo desenvolvido o curso pasado no que participou tamén o alumnado que cursa actualmente 1º da ESO no IES de Barro, que asistiu gustoso xunto a profesorado do seu centro.

Ao final do acto, MAMÁ CABRA posou xenerosamente con alumnado e profesorado e asinou unha bonita dedicatoria no libro de visitas da nosa Biblioteca.

MOITÍSIMOS PARABÉNS, MAMÁ CABRA!

MOITÍSIMAS GRAZAS!

Podedes ver un resumo desta xornada memorábel no seguinte vídeo:

Ademais, o alumnado do colexio deixou nos blogs respectivos as súas impresións.

No blog PEQUECHOLANDIA:

https://pequecholandia.blogspot.com/2018/10/entrega-do-x-premio-mimi-mama-cabra.html

No blog de 1º e 2º:

https://amorruibalprimeirociclo.blogspot.com/2018/10/entrega-do-x-premio-mimi-mama-cabra.html

No blog de 3º e 4º:

https://amorruibalsegundociclo.blogspot.com/2018/10/entrega-do-x-premio-mimi-mama-cabra.html

No blog de 5º e 6º:

https://amorruibaltercerciclo.blogspot.com/2018/10/entrega-do-x-premio-mimi-mama-cabra.html

PISCIS. As augas da vida

Ao longo deste mes de outubro, o alumnado de Infantil e Primaria do noso centro visitou no Concello a exposición fotográfica `PISCIS. As augas da vida´ da artista María José Sánchez (Mj.Bolboreta). O grupo de 1º de Primaria tivo a sorte, ademais, de se atopar na propia sala coa artista, coa que falaron moi animadamente.

O alumnado aproveitou a oportunidade para desenvolver, con moito interese, respeto e atención, actividades variadas de valores sociais e cívicos, educación artística e lectoescritura, que remataron de volta ás aulas.

Amor á Arte e creatividade constante, si!!!

Moitísimas Grazas!!!

As familias contan

Comezamos un ano máis o proxecto "As familias contan". Contan, len, cantan, xogan, acompañan, aprenden, comparten... as familias teñen o seu espazo na biblioteca escolar, na formación dos lectores e das lectoras. 

Con motivo da celebración do día das Bibliotecas convidamos ás familias do noso alumnado a participar con nós na seguinte carta que hoxe difundimos entre o alumnado.

Contamos con vós!
Animádevos a participar!

Ruta "Da auga en calma á auga en movemento"

Este poético título corresponde á ruta de sendeirismo que une os concellos de Pontevedra e Barro e que discorre desde o embalse do Pontillón do Castro a través do monte Acibal ata a Chan de Campodeira, pasando polo Regato de Santa Susana, Triabá (e o seu cruceiro), Mane e Igrexa de San Breixo para rematar na Barosa.

O alumnado de 5º e 6º curso de Primaria fixo a súa primeira saída deste curso escolar para percorrer a pé esta senda coa compaña de mestras do centro e a inestimable guía de Xosé Manuel Fernández Abraldes, artífice da mesma.

Deixaron tetemuña desta saída no seu blog :

http://amorruibaltercerciclo.blogspot.com/2018/10/da-auga-en-calma-auga-en-movemento.html

Amosamos a continuación un vídeo resumo desta andaina:

Moitísimas grazas, Xosé Manuel, por transmitirnos o teu coñecemento e polo tempo dedicado!

Leonardo e os fontaneiros

Tal e como contabamos na entrada anterior, o pasado mércores acudimos á Nave da Música para gozar coa adaptación teatral de "Leonardo e os fontaneiros" representada pola compañía Ubú Teatro.

Posteriormente, o Sr. alcalde, Xosé Manuel F. Abraldes e Mónica Alba, dinamizadora na OMIX de Barro, estiveron na Biblioteca do noso centro para presentar o inicio de actividades na Biblioteca Pública e agasallar ao alumnado de Primaria con cadanseu exemplar de "Leonardo e os fontaneiros" de María Victoria Moreno. 

No seguinte vídeo recollemos un resumo fotográfico destes dous actos.

Moitísimas Grazas!

Bo curso a todos e a todas!

Inauguración do curso escolar 2018-19

Onte, a ilusión de alumnado, profesorado e familias encheu as aulas do CEIP Amor Ruibal de Barro na inauguración do novo curso escolar.

Como colofón á emocionante xornada, a comunidade educativa gozou na Nave da Música da magnífica adaptación teatral de Ubú Teatro da obra Leonardo e os fontaneiros de María Victoria Moreno (Letras Galegas 2018), cunha posta en escena tan impecábel coma divertida.

O acto, organizado polo Concello e promovido pola Deputación Provincial de Pontevedra, contou coa presenza do alcalde, Xosé Manuel Fernández Abraldes e de José Sanmartín (tenente de alcalde e concelleiro de Obras e Servizos), Amelia Cancela (concelleira de Benestar Social, Educación e Sanidade) e Pili Álvarez (responsable da Biblioteca Pública e OMIX de Barro).

Na súa mensaxe de benvida, o alcalde reiterou o compromiso do Concello coa educación e coa cultura no marco da fluída colaboración co noso centro que tanto beneficia ás nosas crianzas.

Moitísimas grazas!

Feliz curso escolar 2018-19!

Arranca un novo curso

A comunidade educativa do CEIP Amor Ruibal de Barro ten mañá unha cita moi importante: A inauguración do curso escolar 2018-19.
Ás 9:00 h recibiremos ás familias no centro e, ás 12:00 h, alumnado, profesorado e familias asistiremos na Nave da Música a unha actividade organizada polo Concello e promovida pola Deputación Provincial de Pontevedra: A representación teatral de "Leonardo e os fontaneiros" de Ubú Teatro, obra homónima de María Victoria Moreno Márquez, autora homenaxeada nas Letras Galegas 2018.

Agardámosvos!

 

DEBERES PARA O VERÁN

Estes son os deberes para o verán:

Descansade e gozade a tope para voltar o vindeiro curso con enerxías renovadas!

Bicos e apertas,

MIMI

Cousas Nosas XVIII

Co remate do curso chegou ás vosas casas a edición en papel da revista escolar. Hoxe publicamos a edición dixital para que a gocedes a toda cor.

Podedes acceder a esta e ás revistas anteriores a través do blog de lecturas e produccións propias, do que tedes enlace na barra da dereita si premedes na imaxe da revista "Cousas Nosas" ou ben premendo no enlace a continuación.

http://lecturasecousasnosas.blogspot.com.es/search/label/Cousas%20nosas.

Lecturas recomendadas

Aquí vos deixamos as recomendacións lectoras da Biblioteca para este verán. Unha ampla variedade de títulos para que gocedes cun libro durante as vacacións.